Diamond awakutanisha Mkojani na Samofi
Mastaa wawili wa filamu nchini ambao pia ni marafiki wa karibu, Mkojani Daruweshi na Samofi wamemaliza ugomvi wao na kupatana hivyo sasa wataendelea kufanya kazi zao kwa pamoja kama ilivyokuwa awali.
Tukio hilo limefanyika leo Machi 29, 2023 katika ofisi za Wasafi Media baada ya kukutanishwa na kusuruhishwa na CEO wa Wasafi, Diamond Platnumz kwa kushirikiana na msanii mwenzao, Dr Cheni.
Mastaa hao waliingia kwenye ugomvi baada ya Samofi kumtuhumu Mkojani kuwa wamekuwa wakifanya kazi pamoja kupitia Kampuni yake ya Mkojani Gang lakini anajinufaisha peke yake na kuwaacha wafanyakazi wengine (waigizaji wake) wakitaabika bila pesa na kutowalipa mishahara yao kwa miezi minne.
Kitendo hicho kilimfanya Mkojani kuifuta kwenye mtandao wa YouTube Tamthilia yao ya Mbambamba na kuzua ugomvi mkubwa ambao hata hivyo leo umefikia tamati na kurejea kuwa marafiki kama awali na kuendelea kufanya kazi pamoja.
“Walidhani pengine mimi napata pesa nyingi kupitia hii kazi, mimi nina kazi nyingine nazofanya, hivyo wao wakiona Napata pesa wanahisi inatokana na kazi niliyofanya nao, napenda kuweka mambo wazi hata wao wanajua tunachokiingiza ni kidogo sana.
“Kwa sasa mambo yote tutayaweka kwenye mikataba hivyo kila mtu atalipwa kutokana na makubaliano ya mikataba yetu. Sisi ni marafiki na tutaendelea kuwa marafiki siku zote,” amesema Mkojani.
Kwa upande wake Samofi ameeleza kuwa kuanika madai yake kwenye vyombo vya habari kumemsaidia kupata watu wa kutatua jambo hilo na kufikia mwafaka hivyo sasa watafanya kazi zao kwa Amani na uaminifu mkubwa.