Denzel Washington alivyofokeana na P Diddy

Wakati 'msala' wa staa mkubwa wa muziki duniani, Sean 'Diddy' Combs ukizidi kuchukua sura mpya kila kukicha, taarifa zinaeleza kuwa staa wa filamu Hollywood, Denzel Washington amewahi kugombana na kufokeana vikali na Diddy kwene moja kati ya pati alizowahi kuziandaa mwaka wa 2003.

Kwa mujibu wa chanzo kilichozungumza na Jarida la Us Weekly, wawili hao waliingia kwenye mabishano makali siku hiyo ambayo yalisababisha waanze kufokeana kwa sauti za juu, Denzel akisikika akisema: "Humheshimu mtu yeyote!"

Denzel alikuwa ameambatana na mkewe, Pauletta Washington kwenye pati hiyo ambapo 'walikula bata' usiku kucha kabla ya ugomvi huo kuibuka alfajiri, Denzel akaondoka na mkewe kwa hasira.

Katika miaka ya 2000, Denzel na Diddy walionekana pamoja mara kadhaa kwenye matukio makubwa ikiwemo kwenye Tuzo za Essence za mwaka 2001, sherehe ya kuapishwa kwa Rais wa zamani wa Marekani, Barack Obama mwaka wa 2009 na kwenye mechi mbili za NBA.

Chanzo hicho kimeeleza kuwa hata hivyo, hakuna aliyejua chanzo cha mabishano ya wawili hao kwani si Denzel wala Diddy aliyekuwa tayari kueleza nini kilichotokea.