Babu Tale atetea udaktari wake, ataja sifa zake

Mbunge wa Morogoro Kaskazini, Hamisi Tale Tale 'Babu Tale' amejitetea kuwa udaktari wake haukupatikana kutokana na ubunge bali ni mchango alioutoa kwenye sekta ya burudani.

Amesema, kwa wanaomfuatilia mchango alioutoa kwenye muziki hawawezi kuwa na wasiwasi kuhusu udaktari ho aliopewa hivi karibuni.

"Hii imekuja baada ya mbunge wa Tanga Rashid Shangazi kuni-attack direct kwamba kuna wengine wamekuja wana miaka miwili, maana yake Tale nimekuwa mbunge kwa muda mchache na kupewa udaktari.

"Mimi sijapewa kwa ajili ya ubunge, nimepewa kwa ajili ya mambo niliyoyafanya kwenye muziki, nimewagusa wengi," alisema Babu Tale.

Mapema hii leo Bungeni, Spika Tulia Ackson alipokazia mwongozo aliouomba Shangazi, alisema kama Taifa kuna kila sababu ya kusimama na kujua tunakwenda vipi katika masuala hayo yanayohusu elimu kwani inaweza kuleta madhara huko baadaye.

Alisema wanaopewa udaktari wa kusomea, wanaweza kuona hawana maana ya kusomea kwani ipo njia ya kununua udaktari huo wa heshima na kisha wote mkaonekana ni madaktari.