Adele atokwa na chozi kumuona Celine Dion

Mwanamuziki mashuhuri duniani anayesifika kwa sauti yake ya kipekee, Adele, usiku wa jana Jumamosi, alibubujikwa na machozi kwa hisia baada ya kumwona mwimbaji mkongwe, Celine Dion akiwa miongoni mwa watazamaji kwenye shoo yake Las Vegas, nchini Marekani.

Adele alishuka jukwaani na kwenda mahali alipokuwa amekaa Celine na kumkumbatia kwa hisia katika Ukumbi wa The Colosseum, Caesars Palace.

Katika video iliyosambaa kwa kasi mitandaoni, Adele na Celine walikumbatiana kabla ya mwimbaji huyo Mwingereza kurudi jukwaani na kuwaambia watazamaji:

"Mpigieni makofi Celine Dion".

Celine alionekana akifuta machozi kwa kitambaa kabla ya kusimama na kuwapungia mkono watazamaji huku Adele akiendelea kuimba wimbo wake maarufu 'When We Were Young'.