Watano mbaroni kwa kughushi vyeti vya udereva

Jeshi la Polisi Mkoani Mwanza linawashikilia watu watano kwa tuhuma za kujihusisha na makosa ya kughushi vyeti vya udereva vinavyotolewa na chuo cha veta.

Akizungumza na waandishi wa habari leo Julai 29, 2023 Kamanda wa Jeshi la Polisi Mkoa wa Mwanza Wilbrod Mutafungwa, amesema watuhumiwa hao wamepatikana baada ya wananchi kutoa taarifa kwa Jeshi la Polisi.

“Awali tulipata taarifa kutoka kwa raia wema juu ya uwepo wa wahalifu hao ndipo askari Polisi walifanya ufatiliaji wa haraka na kufanikiwa kuwakamata kwa nyakati tofauti,ambapo Julai 25, 2023 alikamatwa Esau Yakobo (26) mkazi wa mtaa wa Mecco Kaskazini uliopo Wilaya ya Ilemela Mkoani hapa akiwa na vyeti vyenye majina,namba na vivuli mbalimbali vya leseni za udereva,picha za pasipoti saizi pamoja na barua za Polisi ambazo zimeghushiwa sahihi ya Mkuu wa kikosi cha usalama barabarani”,amesema Kamanda Mutafungwa.

Amesema mtuhumiwa huyo alikamatwa baada ya kukamatwa kwa John Msemo (45) Afisa mauzo wa kampuni ya Chrolide exide aliyefika kituo cha Polisi kwa ajili ya uhakiki wa masaraja ya leseni yake akiwa na barua iliyoghushiwa saini ya Julai 5, 2023 iliyohusu uhakiki wa leseni ya udereva pamoja na cheti alivyodai kuvipata kwa Sixmond George (48) ambaye ni Mkufunzi wa chuo cha udereva Nyanza.