Usiri jaji mpya kesi ya kina Mbowe

Wakati kesi ya uhujumu uchumi, inayomhusisha Mwenyekiti wa Chama cha Demokrasia na Maendeleo (Chadema), Freeman Mbowe na wenzake watatu wanaokabiliwa na mashtaka ya ugaidi ikiendelea leo, usiri mkubwa umetawala kuhusu jaji mpya aliyepangwa kuendelea kuisikiliza.

Kesi hiyo imepangwa kuendelea tena leo, baada ya kusimama kwa siku saba, tangu Oktoba 20, huku Jaji Kiongozi Mustapha Siyani aliyekuwa akiisikiliza alipojitoa kutokana na kuongezewa majukumu.

Jana Mahakama Kuu Divisheni ya Makosa ya Ruswa na Uhujumu Uchumi inayosikiliza kesi hiyo ilitoa hati ya wito kwa pande zote katika kesi hiyo kufika mahakamani leo kuendelea na usikilizwaji wa kesi hiyo.

Tofauti na wakati Jaji Siyani alipopangiwa kusikiliza kesi hiyo, jina lake lilifahamika mapema hata kabla ya siku ya kesi, lakini hati hiyo haikubainisha kuwa mara hii kesi hiyo imepangwa kusikilizwa na jaji yupi.

Hali hiyo ilifanya wadau mbalimbali wanaofuatilia kesi hiyo kuanza kuuliza kwa watu mbalimbali kutaka kujua ni jaji gani ataendelea kuisikiliza huku wengine wakianza kutabiri, kwenye mitandaao ya kijamii wakimtaja Jaji Joachim Tiganga ambaye hata hivyo taarifa zake hazikuthibitishwa na mamlaka husika.