Dar es salaam. Kesi ya kuendesha mtandao ambao haujasajiliwa nchini Tanzania kwa kikoa cha .co .tz (Tanzania domain) inayomkabili, Mkurugenzi Mtendaji wa Jamii Media, Maxence Melo na mwenzake Micke William, imeshindwa kuendelea na ushahidi katika Mahakama ya Hakimu Mkazi Kisutu, Dar es Salaam.
Kesi hiyo ya Jinai namba 458 ya mwaka 2016, ilipaswa kuendelea na ushahidi, lakini upande wa mashtaka hawakuwa na shahidi.
Wakili wa Serikali Mwandamizi, Wankyo Saimon amedai leo Jumatatu Agosti 26, 2019 kuwa kesi hiyo imekuja kwaajili ya kuendelea kusikilizwa lakini shahidi waliomtegemea hayupo na kuomba tarehe nyingine.
"Kesi imekuja kwaajili ya kuendelea na ushahidi lakini shahidi tuliyekuwa tunamtegemea Esther Tully Mwambapa kutoka CRDB hayupo hivyo tunaomba ahirisho kwa mara ya mwisho," amedai Wakili Wankyo.
Kutokana na maelezo hayo, Hakimu Mkazi Mkuu wa Mahakama hiyo, Huruma Shahidi aliutaka upande wa mashtaka kuleta mashahidi mahakamani hapo ili kesi hiyo iweze kumalizika.
Hakimu Shahidi, ameahirisha kesi hiyo hadi Oktoba Mosi, 2019 itakapoendelea na ushahidi.
Katika Kesi ya msingi, washtakiwa wanadaiwa kutenda makosa hayo kati ya Desemba 9, 2011 na Desemba 13, 2016 katika eneo la Mikocheni, wilaya ya Kinondoni.
Washtakiwa wanadaiwa kuendesha mtandao ambayo haujasajiliwa nchini, yaani .tz (Tanzania domain) na kushindwa 'kutoa ushirikiano' kwa Jeshi la Polisi kwa kuzuia taarifa binafsi za wateja wa mtandao wake.
