Mkandarasi Luguruni apewa miezi 6

WAZIRI wa Nishati na Madini, Dk Medard Kalemani ametoa miezi sita kwa Mkandarasi anayejenga kituo cha kufua umeme cha Luguruni kukamilisha ujenzi huo ili kuongeza upatikanaji wa umeme wa uhakika kwa baadhi ya maeneo ya mikoa ya Dar es Salaam na Pwani.

DK Kalemani ametoa agizo hilo leo Dar es Salaam alipofanya ziara ya kukagua maendeleo ya ujenzi wa kituou hicho ulioigharimu serikali zaidi ya Sh. bilioni 15 huku ujenzi wake ukipangwa kuchukua miezi tisa.

Alisema kukamilika kwa ujenzi wa kituo hicho kitakachozalisha Megawati 180 za umeme kutoka katika transfoma mbili zitakazofungwa mahali hapo kutasaidia kutatua tatizo la umeme maeneo mengi ya Jiji la Dar es Salaam likiwemo eneo la Hospitali ya Mloganzila.

Alisema hakuna sababu ya mkandarasi anayejenga kituo hicho kuchelewesha ujenzi wake kwa kuwa tayari fedha za ujenzi wake zimeshatolewa na serikali kwa ajili ya kufanikisha suala hilo haraka iwezekanavyo.