Mhadhiri NIT aliyeomba rushwa ya ngono akiri makosa, ahukumiwa
Dar es Salaam. Mhadhili Msaidizi wa Chuo Cha Taifa cha Usafirishaji (NIT) nchini Tanzania, Samson Mahimbo (69) amehukumiwa kulipa fidia ya Sh2 milioni na faini ya Sh5 milioni au kwenda jela miaka mitatu baada ya kukiri kutumia mamlaka yake kumlazimisha mwanafunzi Victoria Faustine kutoa rushwa ya ngono.
Hukumu hiyo imetolewa leo Jumatatu Novemba 25, 2019 na Hakimu Mkazi Mkuu wa mahakama ya Kisutu, Dar es Salaam Huruma Shaidi.
Amesema kifungu cha 25 cha sheria ya Takukuru ya mwaka 2007 inasema mtu yeyote ambaye yupo kwenye nafasi na akatumia nafasi hiyo kuomba rushwa ya ngono kwa kigezo cha kumpa kazi atakuwa amefanya kosa na atashtakiwa na adhabu yake ni faini ya Sh5 milioni au kwenda jela miaka mitatu.
Shaidi amesema hakuna ubishi kitendo alichofanya ni cha aibu kwa umri wake na taaluma yake anapaswa kuwa mtu mzuri lakini mshtakiwa akaamua kujiingiza katika mapenzi na watoto wadogo.
Amesema vitendo vya rushwa vya ngono vimekuwa gumzo kwa vyuo nchini hivyo inapaswa kupingwa, kuonyesha majibu watoto ni kuwaua kitaaluma na matokeo yake tunapata wataalamu waliofaulu isiyo njia sahihi.
Takukuru yaeleza ilivyomkuta gesti mhadhiri NIT akiomba rushwa ya ngono
Kabla ya kutolewa kwa hukumu hiyo, wakili wa Serikali Mkuu, Zakaria Ndaskoi alisema hana kumbukumbu za makosa ya nyuma za mshtakiwa huyo hivyo ni mkosaji wa mara ya kwanza.
Ndaskoi alidai kufuatia makubaliano ya mshtakiwa aliyoingia na Mkurugenzi wa Mashtaka (DPP ) hawapendekezi kutoa adhabu kubwa hivyo mshtakiwa alikubali kulipa Sh2 milioni na ameshalipa.
Kwa upande wa utetezi, Claudio Msando aliomba isiwape adhabu nyingine kwa kuwa mshtakiwa ni mzee na anaumwa magonjwa ya uzeeni na kutoona vizuri. Pia, anategemewa na familia.
Katika kesi hiyo, mshtakiwa huyo anadaiwa kuwa akiwa mwajiriwa wa NIT, alikuwa akifundisha wanafunzi wa muhula wa kwanza wa masomo wa mwaka 2015/16 anadaiwa kuomba rushwa hiyo kutoka kwa mwanafunzi Victoria Faustine.
Kwamba, alitenda kosa hilo Januari 12, mwaka 2017 katika nyumba ya kulala wageni iitwayo Camp David , iliyopo Mlalakuwa Mwenge.
Inadaiwa mshtakiwa huyo akiwa mwajiriwa wa NIT katika kozi ya Usimamizi wa Barabara na Usafirishaji namba LTU 07101 kwa kutumia mamlaka yake alimlazimisha mwanafunzi huyo kutoa rushwa ya ngono.
Ilidaiwa kuwa, aliomba rushwa hiyo ili aweze kumfaulisha katika mtihani wake wa marudio katika kozi ya Usimamizi wa Barabara na Usafirishaji uliokuwa unafanyika Januari 5 ,mwaka 2017.