Dar es Salaam. Mfanyabiashara nchini Tanzania, Mirajdin Tajdin(32), amefikishwa katika Mahakama ya Hakimu Mkazi Kisutu Dar es Salaam akikabiliwa na mashtaka mawili likiwemo la kusafirisha dhahabu bila kuwa na kibali.
Tajdin ambaye ni mkazi wa Mtoni Mtongani amefikishwa mahakamani hapo leo Alhamisi, Juni 20, 2019 na kusomewa mashtaka na wakili wa Serikali Ester Martin.
Martine amedai mshtakiwa anakabiliwa na kesi ya uhujumu uchumi namba 50/ 2019.
Akimsomea hati ya mashtaka, mbele ya Hakimu Mkazi Mkuu wa mahakama hiyo, Janeth Mtega, Wakili Martin amedai mshtakiwa anadaiwa kutenda kosa hilo April 30, 2019 katika uwanja wa ndege wa Kimataifa wa Mwalimu Nyerere( JNIA) uliopo wilaya ya Ilala.
Amedai siku hiyo ya tukio, mshtakiwa alikutwa na vipande vya dhahabu vyenye uzito wa gramu 98, vikiwa na thamani ya dola za Marekani 3636.92, sawa na Sh 8, 364,914 Mali ya Jamhuri ya Muungano wa Tanzania.
Katika shtaka la pili, muda na eneo hilo, Tajdin anadaiwa kusafirisha dhahabu hiyo bila kuwa na kibali kutoka Mamlaka husika.
Pia Soma
- Mbunge CCM asema hali ya uzalishaji wa mazao ya biashara si nzuri
- Mkenya kortin kwa kusafirisha madini ya Sh500 milioni
- Aliyehukumiwa miaka 20 kwa kubaka, akabiliwa na kesi mbili za kubaka
Hata hivyo, mshtakiwa baada ya kusomewa mashtaka yanayomkabili, alikiri kutenda makosa hayo.
Hakimu Mtega baada ya kusikiliza maelezo ya upande wa mashtaka, alitoa masharti ya dhamana kwa mshtakiwa huyo ambayo ni kuwa na mdhamini mmoja mwenye barua kutoka Serikali ya Mtaa, atakayesaini bondi ya Sh8 milioni.
Mshtakiwa ameshindwa kutimiza masharti ya dhamana na kurudishwa mahabusu.
Hakimu Mtega ameahirisha kesi hiyo hadi Julai 4, 2019 kwa ajili mshtakiwa kusomewa hoja za awali(PH).