Jamaa ampiga mawe mke wake mpaka kumuua

Polisi katika eneo la Mutunduri, kaunti ya Embu wameanzisha msako wa kumtafuta mwanamume anayedaiwa kumpiga kwa mawe mkewe mwenye umri wa miaka 32 hadi kufa.

Akithibitisha kisa hicho, Naibu Kamishna wa Kaunti ya Embu Kaskazini William Owino alisema kuwa mwanamume mmoja anayejulikana kama Robinson Wanyama alimpiga kwa mawe mkewe Phyllis Nyarenima mwenye umri wa miaka 32 hadi kufa usiku wa Desemba 19.

DCC alisema kuwa wakaazi wa Mutunduri waliamshwa na mayowe ya mwanamke huyo na kumpata akivuja damu nyingi usiku wa manane Jumapili 19.

Owino aliongeza kuwa mwanamke huyo alitokwa na damu nyingi na kutangazwa kuwa amefariki kabla ya kupelekwa hospitalini.

"Inasikitisha sana kwamba wanandoa ambao waliishi kwa amani kwa muda mrefu wanaweza kusababisha mauaji ya kila mmoja, tafadhali tutafute njia mbadala za kutatua matatizo katika familia yanapotokea. Hata kama gharama ya maisha ni ya juu sana, msiiruhusu iwafanye muuane bali tafuta usaidizi wa kuwashughulikia kutoka afisi zetu,” alisema Owino.

DCC alisema kwamba Wanyama alipogundua kuwa mkewe amefariki, alienda mafichoni na kuacha maiti yake na watoto wao wawili.

Naibu Kamishna wa Kaunti ya Embu Kaskazini aliongeza kuwa polisi bado hawajabaini sababu ya Wanyama kumuua mkewe lakini wameanzisha uchunguzi kubaini chanzo cha mauaji hayo. "Polisi bado hawajabaini sababu ya Wanyama kumuua mkewe lakini wameanzisha uchunguzi kuhusu kisa hicho ili kubaini sababu ya mauaji hayo," alisema Owino.

Alieleza imani yake kuwa licha ya mtuhumiwa huyo kuwa mbioni baada ya kudaiwa kumpiga mke kwa mawe hadi kufa lakini polisi wataweza kumkamata hivi karibuni.

Mwili wa Phyllis Nyarenima ulipelekwa katika chumba cha kuhifadhia maiti cha hospitali ya Embu Level 5 ukisubiri uchunguzi wa maiti.