Aliyeoa mwanafunzi apandishwa mahakamani

Serengeti. Mkazi wa kijiji cha Iseresere wilayani Serengeti mkoani Mara, Peter Marko (30) amefikishwa katika mahakama ya wilaya ya Serengeti mkoani humo kwa kosa la kuoa mwanafunzi wa shule ya sekondari.

Mbele ya hakimu mkazi mfawidhi wa wilaya hiyo, Ismael Ngaile mwendesha mashitaka wa Polisi, Renatus Zakeo amesema Marko alitenda kosa hilo Mei, 2018.

Katika kesi hiyo ya jinai namba 231/2018, inadaiwa mshitakiwa alimuoa mwanafunzi wa kidato cha pili wa Shule ya Sekondari Kisaka kinyume cha sheria.

Mshitakiwa amekana kosa na amepelekwa mahabusu, kesi hiyo ambayo upelelezi haujakamilika imeahirishwa hadi Septemba 17, 2018.