Aliyejaribu kunajisi mwanafunzi afungwa

MAHAKAMA ya Wilaya ya Kalambo mkoani Rukwa imemhukumu mkazi wa kijiji cha Mwazye, Chrisant Longwani (32) miaka 30 jela baada ya kumtia hatiani kujaribu kumnajisi mwanafunzi wa kike (11) wa darasa la nne.

Hakimu Mkazi wa mahakama hiyo, Nickson Temu alisema ametoa adhabu hiyo baada ya mshitakiwa kukiri kosa lake. Alisema kuwa mshitakiwa alitenda kosa hilo kinyume na kifungu 132 (1) cha Sheria, Kanuni ya Adhabu.

Alisema mahakama hiyo imeridhishwa na ushahidi wa upande wa mashtaka ambao haukuacha shaka kuwa alitenda kosa hilo.

Awali Mwendesha Mashtaka, Rajab Ndunda alidai mahakamani hapo mshitakiwa alitenda kosa hilo Machi 30 mwaka huu usiku ambapo alimvamia msichana na kurarua nguo zake.

Akijitetea mshitakiwa alikiri kutenda kosa hilo na kuiomba mahakama kumpunguzia adhabu kwa kuwa ni kosa la kwanza ana familia kubwa.