Afikishwa kortini kwa kutoa rushwa Tsh. 300,000

Taasisi ya Kuzuia na Kupambana na Rushwa (TAKUKURU) wilaya ya Igunga mkoani Tabora imemkamata mkazi wa Kijiji cha Isenegeja, Kata ya Mwisi katika Wilaya ya Igunga, Richard Masanja (44) na kumfi kisha mahakamani kwa tuhuma ya kutoa rushwa ya Sh 300,000 kwa Katibu wa Baraza la Ardhi.

Masanja ambaye ni mkulima, alifikishwa katika mahakama ya Hakimu Mfawidhi Wilaya ya Igunga kwa kutoa rushwa kwa Katibu wa Baraza la Ardhi, Kata ya Mwisi, Philipo Mabula.

Akimsoma shitaka mbele ya Hakimu wa Mahakama ya Mwanzo Wilaya ya Igunga, Juhudi Mdonya, Mwendesha Mashitaka wa Takukuru, Wilaya ya Igunga, Mazengo Joseph alidai mshitakiwa alitoa kiasi hicho kama kishawishi cha kupewa upendeleo katika kesi yake ya mgogoro wa ardhi dhidi ya Mhoja Ntima iliokuwepo katika baraza hilo.

Masanja hakutakiwa kujibu chochote kwa kuwa mahakama hiyo haina mamlaka ya kusikiliza shauri hilo. Kesi iliahirishwa hadi Januari 28, 2022 na mshitakiwa amepelekwa mahabusu baada ya wadhamini kushindwa kutimiza masharti ya dhamana.