Thamani bidhaa zilizoteketea ghala la TRA ni Tsh. milioni 500

Thamani ya bidhaa zilizoteketea kwa moto kwenye ghala lililopo kwenye bandari ya Tanga linalomilikiwa na Mamlaka ya mapato Tanzania  'TRA' mkoani humo kuhifadhia bidhaa  za magendo zilizokamatwa na  zilizoshindwa kulipiwa ushuru imejumlishwa na kufikia zaidi ya  milioni mia tano.

Mkuu wa Mkoa wa Tanga Omari  Mgumba ametoa kauli hiyo ofisini kwake wakati  akiwa na waandishi wa habari mara baada ya kuunda kamati ya watu 11 kwaajili ya kufanya uchunguzi wa kina kubaini chanzo cha moto huo uliosababisha hasara  kwa mali zilizokuwa zimehifadhiwa ndani ya ghala hilo. 

"Thamani inayokadiriwa kutokana na thamani iliyopo kwenye nyaraka   ambayo sio thamani ya soko ni zaidi ya shilingi milioni 541 ambayo kodi yake ni zaidi ya milioni  423 hii ni thamani ya bei ambayo imeandikwa kwenye nyaraka ndiyo tumeichukuwa " alisema Mgumba.

Mgumba amesema kuwa kamati hiyo itachukuwa siku saba kutafuta chanzo cha moto huo  na miongoni mwa watu watakaohojiwa ni pamoja na  mtumishi  wa mamlaka ya mapato Tanzania Mkoa wa Tanga  aliyemtaja kwa jina moja la Kisaka ambaye ambaye yupo kwenye kamati maalumu ya kupambana na bidhaa kwa kushindwa kutoa  ushirikiano wakati tukio hilo likiendelea hata alipopigiwa simu yake ya kiganjani hakutoa ushirikiano wowote.