Taasisi za fedha zavutwa Mabadiliko Tabianchi

Wadau wa mazingira jana walieleza haja ya taasisi za fedha kuunganisha nguvu zao katika kukusanya fedha ili kutoa ufumbuzi wa kifedha utakaoshughulikia changamoto za kimazingira na kijamii.

Wito unaokusudiwa kupunguza athari za mabadiliko ya tabianchi ulitolewa jana wakati wa uzinduzi wa Ripoti ya Benki ya Standard Chartered ‘Here for Good: A Sustainable Future for Tanzania’.

Kulingana na Shirika la Afya Duniani (WHO), mabadiliko ya hali ya hewa tayari yanaathiri afya kwa njia nyingi, ikiwa ni pamoja na kusababisha vifo na magonjwa kutokana na mabadiliko ya hali ya hewa yanayojitokeza mara kwa mara. Baadhi ya matukio ya hali ya hewa ni pamoja na mawimbi ya joto, dhoruba na mafuriko, usumbufu wa mifumo ya chakula. Ofisa Mtendaji Mkuu wa Standard Chartered, Herman Kasekende alisema makampuni mengi yanapambana na changamoto ya mtaji ili kuboresha shughuli zao kwa njia endelevu.

Akitoa mfano wa uwekezaji katika vyanzo safi vya nishati mbadala, alisema uwekezaji unaohitajika ni mkubwa mno kuweza kumudu makampuni mengi.

"Matumizi ya mtaji yanahitajika ili kuboresha shughuli za kampuni kwa nia ya kupunguza uzalishaji wa kaboni," alisema Bw Kasekende katika mjadala wa jopo.

Alisema kwa kiwango cha kimataifa, Standard Chartered Group mwaka jana iliahidi kukusanya dola bilioni 300 kutoka kwa washirika wa maendeleo kwa ajili ya fedha endelevu ifikapo mwaka 2030.

"Kiasi hiki ni makusudi kwa ajili ya masoko yanayoibukia na nchi zinazoendelea hasa kutoka Afrika, Mashariki ya Kati na Asia," alisema.

"Kama kampuni inayowajibika, tumezingatia kutafuta njia mpya za kuongeza ufanisi wa kazi na tumejitolea kufanya uzalishaji usio na madhara kwa kutumia vyanzo vya nishati mbadala ifikapo 2025," inasomeka sehemu ya ripoti mpya ya benki.

Mkurugenzi Mkuu wa Shirika la Reli Tanzania (TRC) Masanja Kadogosa alieleza haja ya serikali na sekta binafsi kushikamana ili kuimarisha biashara endelevu ili kupunguza athari za mabadiliko ya tabianchi ambayo ni ya kweli.