TPDC, ARA walipa fidia wananchi 203 Mtwara

SHIRIKA la Maendeleo ya Petroli Nchini (TPDC) kwa kushirikiana na Kampuni ya ARA Petroleum wameanza kufanya malipo ya fidia kwa wananchi 203, ambao mazao yao yameharibiwa wakati wa utafutaji gesi asilia eneo la Ntorya, mkoani Mtwara.

Akizungumza na waandishi wa habari mkoani Mtwara, Ofisa Uhusiano na Mawasiliano TPDC, Jacob Haule, amesema wananchi hao wanatarajira kulipwa kiasi cha Sh milioni 65.

"Kipindi tunafanya utafiti wa gesi asilia maeneo haya ya Ntorya, kulikuwa na mazao ya wananchi, ambayo yaliathiriwa na kutulazimu sasa kuwalipa fidia kwa mujibu wa sheria," amesema.

Haule amesema TPDC na ARA Petroleum walishafanya malipo kwa awamu ya kwanza mpaka ya tatu, ambapo wananchi 4066 kati ya 4269 walilipwa kiasi cha Sh bilioni 1.5 na kubakia wananchi 203.

Haule amesema ulipaji fidia awamu ya nne na ya mwisho itafanyika kwa muda wa siku 10.

Mwenyekiti wa kijiji cha Nachuwa Kata ya Mkunwa Mkoani Mtwara ameshukuru TPDC na ARA Petroleum kwa kuanza ukamilisha wa fidia awamu ya mwisho huku akisima wananchi hao walikuwa wakiwabana viongozi sana wakitaka fidia yao.

"Nimefarijika sana TPDC kuanza kulipa malipo ya fidia kwa wananchi waliobaki, walikuwa wanatubana sana wakitaka fidia yao," amesema.