TANTRADE yatamba kuboresha mazingira ya biashara

Kamati ya Kudumu ya Bunge ya Viwanda, Biashara, Kilimo na Mifugo imeipongeza Mamlaka ya Maendeleo ya Biashara Tanzania (TANTRADE) kwa kuboresha mazingira ya biashara hususani maonesho ya 47 ya Biashara ya Kimataifa ya Dar es Salaam (Sabasaba) 2023.

Vilevile kamati hiyo imeiagiza TANTRADE kuandaa mikakati mahususi ikiwemo ya uboreshaji wa miundombinu katika maonesho ya Sabasaba na utafutaji wa masoko kwa bidhaa za Tanzania, mikakati inayoendana na wakati na mabadiliko ya teknolojia.

Hayo yamesemwa jijini Dodoma na Makamu Mwenyekiti wa kamati hiyo Mariam Ditopile wakati akipokea taarifa ya Hali Halisi ya Utendaji wa majukumu ya TANTRADE.

Wajumbe wa kamati hiyo pia walipata fursa ya kutoa maoni kuhusu uendelezaji wa biashara hususani mauzo ya nje, utafutaji wa masoko, biashara mtandao na mapendekezo ya kutatua changamoto mbalimbali zinazojitokeza katika ukuzaji wa biashara.

Kwa upande wake Naibu Waziri wa Viwanda na Biashara Exaud Kigahe akijumuisha maoni na mapendekezo hayo ameihakikishia kamati hiyo ya Kudumu ya Bunge ya Viwanda, Biashara, Kilimo na Mifugo kuwa maelekezo na mapendekezo yote iliyoyatoa yatatekelezwa ili kuendelea kuweka mazingira mazuri ya biashara, kukuza biashara na mauzo ya ndani na nje na hatimaye kukuza uchumi wa nchi.