NMB yaingia soko la mitaji Ulaya

Benki ya NMB imeorodhesha Hati Fungani ya Jasiri kwenye Soko la Hisa la Luxembourg (LuxSE) kwa lengo la kupata fedha za kuwezesha wanawake kiuchumi na kufadhili shughuli zao za biashara na uzalishaji mali.

Hatua hiyo inafanya Hati Fungani ya NMB Jasiri kuwa dhamana ya muda mrefu ya kwanza kutoka Nchi za Kusini mwa Jangwa la Sahara kuorodheshwa kwenye soko la LuxSE ambalo linazidi kusifika kama kitovu cha ufadhili unaozingatia usawa wa kijinsia.

Akizungumza kwenye hafla ya kuorodheshwa kwake nchini Luxembourg, Mhazini wa NMB, Aziz Chacha, aliyemwakilisha Ofisa Mtendaji Mkuu wa benki hiyo, Ruth Zaipuna, alisema hatua hiyo si tu ya kihistoria kwa taasisi hiyo kubwa kuliko zote za fedha nchini bali pia ni udhibitisho wa dhamira yao ya kuchangia kuwakwamua wanawake kiuchumi.