Mtaka: Makambako ni lango la biashara

Mkuu wa Mkoa wa Njombe, Anthony Mtaka amesema mji wa Makambako ni lango la biashara na anaufananisha mji huo kama ulivyo mji wa Mkuranga mkoani Pwani ambao una viwanda vingi.

Mtaka amesema hayo wakati wa ziara ya Katibu Mkuu wa Chama Cha Mapinduzi (CCM) Dkt. Emmanuel Nchimbi, Makambako mkoani Njombe.

Mtaka ameongeza kuwa, wao kama mkoa wana mipango ya kuifanya Makambako kuwa mji wa viwanda na tayari wameanza ujenzi wa kiwanda cha chuma na hivyo wananchi mkoani humo hawatapata tena adha ya kufuata chuma mkoani Dar es Salaam.

Pia wana mpango wa kuongeza thamani ya zao la Parachichi ambalo linalimwa sana mkoani humo.

Aidha, Mtaka ameipongeza Mamlaka ya Mapato Tanzania (TRA) kwa kuendelea kuwaelekeza wananchi namna nzuri ya ulipaji kodi bila bughudha na hivyo kuwataka wafanyabiashara mkoani humo kufanya shughuli zao kwa utulivu.