Mradi wa ng'ombe wa maziwa mkombozi wa uchumi Bunda

Wananchi wa Wilaya ya Bunda, Mkoa wa Mara, wamebainisha mafanikio wanayopata kupitia mradi ufugaji wa ng'ombe wa maziwa, wakisema umewawezesha kupambana na umaskini wa kipato.

Kauli hii imetolewa hivi karibuni wakati wa uzinduzi wa mradi unaofadhiliwa na Grumeti Fund, ambao unalenga kuinua maisha ya vijiji vya Mugeta na Nyichoka katika wilaya za Bunda na Serengeti.

Kampuni ya Grumeti Fund imetoa ng'ombe wa maziwa 15, yenye thamani ya Sh52 milioni, kwa vijiji vya Motukeri na Nyichoka wilayani Serengeti, pamoja na vijiji vya Mugeta na Tingirima wilayani Bunda katika sehemu ya awamu ya kwanza ya mradi unaolenga kuhamasisha ufugaji wenye tija na utunzaji wa mazingira.

Proscovia Gambahewa, mkazi wa Kijiji cha Nyichoka, Serengeti, ametoa ushuhuda wa mafanikio aliyopata kutokana na mradi huo, akieleza jinsi alivyopata mafunzo ya kutosha kuhusu utunzaji bora wa ng'ombe wa maziwa, pamoja na kupewa mbegu bora za malisho kama vile Super Napier.

Hivyo, amesema sasa ana uhakika wa kipato kupitia maziwa na pia anaweza kuuza ziada yake, huku akishukuru kwa fursa hiyo.

Joyce Gasana kutoka Kijiji cha Mugeta ameeleza kwamba kabla ya mradi huo, walikuwa wakifuga kienyeji bila kupata mapato ya kutosha.

Lakini kwa sasa, amesema wanaweza kuhakikisha kipato kupitia mauzo ya maziwa. Ameshukuru Grumeti Fund kwa mafunzo na ng'ombe ambao wamemwezesha kubadilisha maisha na kuwa na uhakika wa kipato.

Meneja wa Programu ya Ufikiaji wa Jamii ya Grumeti Fund, Frida Mollel, ameeleza kwamba mradi huo unalenga kupambana na athari za mabadiliko ya hali ya hewa kwa wakulima na wafugaji. Amefafanua kuwa mradi huo unalenga kuleta mapinduzi katika ufugaji kwa kuanzisha mbinu endelevu na za kisasa.

Mradi huo ulioanza mwaka jana na sasa umezinduliwa rasmi katika vijiji 22 vinavyopakana na mapori ya akiba ya Ikorongo-Grumeti.

Kampuni hiyo pia inasaidia kuhifadhi mazingira ya ikolojia ya Serengeti na kuinua maisha ya jamii zinazopakana na eneo hilo.

Hatua zinazochukuliwa ni pamoja na kupambana na ujangili, kurejesha makazi, kufanya utafiti wa wanyamapori, na kutekeleza miradi ya maendeleo ya jamii.