TanzaniaWeb
Dar Es Salaam. Mahakama ya Hakimu Mkazi Kisutu imemhukumu mfanyabiashara wa madini, Hafidhi Jonggradgorn, kulipa faini ya Sh5 milioni au kwenda jela miaka mitano baada ya kupatikana na hatia ya kumiliki madini bila kuwa na leseni.
Hafidhi maarufu Hafidhi Jong mkazi wa Mikocheni, Dar es Salaam anakabiliwa na mashtaka mawili katika kesi ya uhujumu uchumi namba 37/ 2018, likiwemo la kumiliki madini ya vito mbalimbali vyenye thamani ya dola za kimarekani 105,757.
Hata hivyo, mshtakiwa huyo alilipa faini hiyo na kukwpa kifungo.
Hukumu hiyo imetolewa leo Oktoba Mosi, 2018 na Hakimu Mkazi Mkuu wa Mahakama hiyo, Wilbard Mashauri baada ya mshtakiwa kukiri mashtaka yanayomkabili.
Pia, mahakama hiyo imeamuru madini hayo yataifishwe na yakabidhiwe Tume ya Madini.
Awali, Wakili wa Serikali Jacqline Nyantore amedai mahakamani hapo kuwa kesi ilikuja kwa kutajwa na upelelezi wa shauri hilo umekamilika.
“Kesi imekuja kwa ajili ya kutajwa na upelelezi wa shauri hili umekamilika. Mkurugenzi wa Mashtaka ( DPP) amewasilisha hati ya kuruhusu kesi hii isikilizwe katika Mahakama yako na tuko tayari kumsomea maelezo ya awali( PH)" amedai Nyantore.
Wakili Nyantore amedai katika shtaka la kwanza la kusaidia kutenda kosa, Hafidhi anadaiwa kati ya Januari Mosi, 2017 na Juni 3, 2018 katika maeneo mbalimbali ya Jiji la Dar es Salaam, nchi za Falme za kiarabu na India, akiwa sio mtumishi wa umma kwa makusudi alifadhili biashara ya mchongo wa jinai kwa lengo la kujipatia faida.
Katika shtaka la pili la kumiliki madini bila kuwa na leseni, Nyatore amedai Juni 3, 2018 katika eneo la Mikocheni A, mtaa wa Chwaku, Hafidhi alikutwa na Vito vya madini mbalimbali aina ya Coloured Gemstones yakiwa na uzito wa kilo 67.76, yenye thamani ya dola za kimarekani, 105,757, bila kuwa na leseni wala uhalali wa kumiliki madini hayo.
Mshtakiwa baada ya kusomewa mashtaka hayo, alikiri mashtaka yake, hali iliyopelekea Hakimu Mashauri kuandaa hukumu.