Mapato Stendi ya Magufuli ni Tsh milioni 10 kwa siku

Halmashauri ya Manispaa ya Ubungo imeeleza kuwa katika kipindi cha kuelekea mwishoni mwa mwaka kumekuwa na ongezeko la mapato katika kituo cha mabasi cha Magufuli jijini Dar es Salaam.

Taarifa iliyotolewa na manispaa hiyo leo Desemba 16, 2023 imeeleza kuwa kuelekea msimu wa sikukuu ushuru unaotokana na mabasi yanayoingia na kutoka ndani ya kituo cha Magufuli umeongezeka kutoka Sh milioni 8.3 kwa siku hadi kufikia Sh milioni 10.1.

Aidha taarifa hiyo imeeleza kuwa mapato yatokanayo na viingilio vya getini yameongezeka kutoka Sh milioni 5.1 kwa siku hadi kufikia Sh milioni 6.4 kwa takwimu za kuanzia Desemba mosi hadi Desemba 14, 2023.

Pia kumekuwa na ongezeko la mabasi ndani ya kituo hicho ambapo kwa kipindi cha mwezi Desemba yameongezeka kutoka mabasi 270 hadi mabasi 315 yanayoingia kituoni hapo.