Manji Aiaga Tanzania

Mfanyabiashara Yusuf Manji amerejea ughaibuni baada ya kukaa nchini kwa takribani mwezi mmoja huku akikumbana na misukosuko baada ya kukamatwa na kuhojiwa na Taasisi ya Kuzuia na Kupambana na Rushwa (Takukuru) na kisha kuachiwa kwa dhamana.

Inadaiwa kuwa Manji alirejea Afrika Kusini aliko mpaka sasa na kwamba kuna uwezekano ikamchukua muda zaidi kurejea tena nchini.

Manji, aliyeondoka nchini mwaka 2018, alirejea nchini Juni Mosi na baada ya kuwasili katika Uwanja wa Ndege wa Kimataifa wa Julius Nyerere (JNIA) alishikiliwa na maofisa wa Takukuru kwa mahojiano.

Mfanyabiashara huyo aliyeshikiliwa kwa siku nne na Takukuru ikielezwa kuwa ana tuhuma tatu, ikiwemo ya kuisababishia Serikali hasara kwa kukwepa Kodi ya Ongezeko la Thamani (VAT) katika biashara yake na Shirika la Umeme nchini (Tanesco), baada ya kuachiwa kwa dhamana moja ya shughuli alizoshiriki ni mkutano mkuu wa klabu ya Yanga na ndio tukio pekee aliloonekana hadharani na kuzungumza.