Dar es Salaam. Rais John Magufuli amesema maduka ya kubadilishia fedha nchini yaliyokuwa yakifunguliwa kama uyoga yalikuwa uchochoro wa kusafirisha fedha chafu nje ya nchi.
Rais Magufuli amesema hayo leo wakati akimuapisha Balozi wa Tanzania nchini Cuba, Valentino Mloweza na kupokea taarifa ya kazi ya Taasisi ya Kuzuia na Kupambana na Rushwa (Takukuru).
Amesema watu walikuwa wakiiba fedha Benki Kuu (BOT) na kwenda kuuza kwenye maduka ya kubadilishia fedha, lakini wakiulizwa hawakuwa wanasema wameuza kiasi gani.
Amesema hakukuwa na ripoti yoyote inayoonyesha wameuza kiasi gani cha fedha na kwamba suala hilo ilikuwa utapeli na kutikisa uchumi wa nchi.
“Na wakishatoka kule wanatumia ‘exchange bureau moja (duka moja la kubadilishia fedha) wanamuuzia mtu wao kwa bei ya Sh1,400.”
“Na wanachukua hiyo ‘cotation’ kwamba ‘exchange ya TSh (fedha ya Tanzania) imepanda juu na ile ni kudistable (athiri) uchumi wa nchi, nikamwambia gavana hebu kafanye kazi moja huko,” amesema.
Related Content
- Magufuli aagiza mke wa Mlowola kupangiwa kazi Cuba
- Magufuli amwapisha Valentino Mlowola Balozi wa Tanzania Cuba
- Rais Magufuli apokea ripoti ya utendaji kazi wa Takukuru
“Ulikuwa utapeli tu kutikisa uchumi wetu, nikimuuliza wewe kweli huna dola huku mzee, anasema ninazo nyingi mno. Fedha zipo hata za reserve (akiba) zipo, nchi inaweza kuishi zaidi ya miezi mitano bila kukusanya fedha yoyote.”
“Wizi wa ajabu umekuwa ukifanywa na zile ‘transactions’ (miamala) za ajabu bila utaratibu, hakuna nchi nenda hata zilizoendelea, mimi nilienda Ujerumani mpaka nilitoa passport (hati ya kusafiria) kubadilisha fedha mpaka askari anaangalia natembeaje na dola 2,000,” amesema.
Rais Magufuli amesema fedha za dawa za kulevya pia zimekuwa zikipita huko (maduka ya kubadilishia fedha).
