Machinga Mwenge wapewa siku 3 kuondoka

Wafanyabiashara wadogo maarufu Machinga wa eneo la Mwenge, Wilaya ya Kinondoni, mkoani Dar es Salaam wamepewa siku tatu kurejea kwenye soko jipya la Coca-Cola.

Atakayekaidi agizo hilo maeneo yaliyobaki wazi katika soko jipya yatagawiwa kwa wafanyabiashara wengine.

Desemba 20, mwaka jana, Nipashe iliandika ripoti maalum ya kilichojificha machinga kuondoka masoko ya barabarani ikiliangazia soko la Mwenge ambalo Manispaa ya Kinondoni ilieleza juhudi inazofanya kuhakikisha kundi hilo linaondoka.

Juzi jioni gazeti hili lilishuhudia tangazo likitolewa kwa wafanyabiashara hao kupitia kipaza sauti kilichofungwa soko jipya huku wale wanaofanyabiashara soko lisilo rasmi, wakiendelea na biashara zao walizopanga barabarani.

Gazeti hili lilipomtafuta kiongozi wa machinga sokoni la Coca-Cola, Samata Matelephone alisema, wafanyabiashara hao wanatakiwa kurejea kwenye meza zao walizoziacha ndani ya muda waliopewa.

“Wamepewa siku tatu kuanzia leo (juzi) na baada ya kuisha ambaye hatarejea kwenye meza yake aliyoiacha wazi hapa sokoni, eneo lake atapewa mtu mwingine mwenye uhitaji wa kufanyabiashara.

“Kinachotakiwa ni soko hili ambalo serikali limetenga kwa ajili ya wafanyabiashara wadogo na kuwapatia bure lijae, ili wateja waje hapa na sio barabarani ambako baadhi ya wenzetu wanakaidi kutoka.”

Alisema baada ya muda huo watakaokaidi maeneo yao yatapewa wengine na kigezo ni mtu kwenda na biashara yake kwa kuwa eneo hilo walipewa bure.