Hassan Mwakinyo, Mtanzania asieyumbishwa na namba katika Masumbwi

Bondia Namba moja nchini Hassan Mwakinyo, amefunguka kuhusu kuporomoka kwenye ubora wa dunia na kusisitiza kwamba anguko lake kwenye renki sio la kuumiza.

Mwakinyo aliyeporomoka ka nafasi tano kutoka ya 10 hadi 15 hivi karibuni ni bondia wa nyota nne kwenye ubora huo katika uzani wa Super welter weight.

Nafasi ya 10 Kidunia ilikuwa ni rekodi ya Juu kwa Mwakinyo ambaye ameendelea kusalia nafasi ya kwanza Afrika, rekodi aliyoitengeneza tangu 2018 alipomchapa Sam Eggington aliyekuwa bondia namba nane wa dunia.

Mwakinyo anasema panda Shuka yake katika ubora wa viwango haujamuumiza kwa kuwa sio ya kiufundi na ana uhakika atarejea kwenye nafasi yake hivi karibuni.

"Ni kweli nimeshuka kwenye renki, lakini kushuka kwa kutoicheza sio sawa na kuporomoka renki kwa kupigwa, mimi nimeshuka kwa kutocheza sio kupigwa"

"Nyota na Pointi zangu ziko pale pale, tofauti na Bondia aliyeshuka kwa kucheza na kupigwa ambaye atapunguza nyota na Pointi" ametanabaisha Mwakinyo