Dullah Mbabe amjibu Cheka

Abdallah Pazi ‘Dullah Mbabe’ amemjibu Francis Cheka kuhusu pambano lao la marudiano ambalo Cheka alitaka.

Cheka tangu Desemba 2018 alipochapwa na Mbabe kwa Knock Out (KO) hajawahi kurudi ulingoni hadi hivi karibuni Cheka alipotaka marudiano.

Jana Mbabe ameiambia Mwanaspoti kuwa hana mpango na pambano hilo akisisitiza kwamba hivi sasa anajikita kwenye mambo mengine.

“Hivi sasa siwezi kurudiana naye, kwa Kiduku (Twaha Kassim aliwahi kupigwa naye kwa pointi) ikitokea marudiano pia nitaangalia nikiwa sawa natangaza vita naye,” alisema.

Baada ya pambano lake la karibuni aliloshinda kwa KO, Mbabe amejipa mapumziko ya muda mfupi na wakati wowote kuanzia sasa ataendelea na mazoezi ya kujiweka fiti.

“Bado niko chini ya kocha Master (Habibu Kinyogoli) anazidi kunijenga na kuwa bora zaidi, hivyo wakati wowote nitatangaza vita,” alisema.