Bondia Kidunda kumvaa Mukala Ijumaa

Bondia wa ngumi za kulipwa, Patric Mukala kutoka Jamhuri ya Kidemokrasi ya Congo (DRC) ametua nchini jana usiku tayari kwa pambano lake la kuwania mkanda wa Ubingwa wa Afrika, ABU, katika uzani wa Super Middle dhidi ya Mtanzania, Seleman Kidunda.

Mukala ambaye atacheza pambano kuu dhidi ya Kidunda katika pambano hilo linalotarajia kupigwa Februari 24, mwaka huu, kwenye Ukumbi wa Ubungo Plaza.

Akizungumza nasi jana, promota wa pambano hilo kutoka Kemmon Sports Agency, Saada Salum alisema kuwa Mukala na jopo lake la ufundi wanatarajia kutua nchini usiku wa jana.

Alisema maandalizi yote yanaenda vizuri kuelekea pambano na tayari Mukala ameshatua nchini kukabiliana na mpinzani wake, Kidunda na ana imani litakuwa pambano la aina yake kwa sababu ya historia ya mabondia hao.

"Mpinzani wa Seleman Kidunda, Patric Mukala, tumempokea akitokea Afrika Kusini tayari kwa pambano lake la kuwania mkanda wa ABU dhidi ya Kidunda,” alisema Saada.

Aliongeza: “Kama tulivyowaambia awali kwamba Kemmon Sports Agency tumejipanga kuleta mapinduzi katika mchezo wa ngumi hivyo tunaomba waendelee kununua tiketi katika vituo ambavyo vimekuwa vinauza ambazo zinapatikana kwa bei ya Sh. 10,000, Sh. 20,000 na Sh. 50,000 kwa VIP A," alisema Saada.