Anthony Joshua vs Tyson Fury, ngoma ngumu

Kama ulitegemea kushuhudia pambano kubwa baina ya Waingereza wakali wawili kwenye medani ya masumbwi ya uzito wa juu duniani kwa sasa (heavyweight), Tyson Fury dhidi ya Anthony Joshua, basi uanze kufuta wazo hilo.

Mabondia hao walikaribia kupambana mwaka jana kama sio Joshua kutibua kwa kuchapwa mara mbili mtawalia na bondia Oleksandr Usyk.

Kitendo cha kuchapwa kwa bondia huyo kilimshangaza Fury aliyekuwa ametengua uamuzi wa kustaafu ngumi ili apigane na Joshua, lakini mambo yakaenda mrama dakika za lalasalama.

Kilichofuata sasa Fury kumfikiria zaidi Usyk aliye na mikanda mitatu ya uzito wa juu ikiwa ni ile ya WBA, WBO na IBF aliyomnyang’anya Joshua, huku Fury akiwa na mkanda wa WBC uzito huo.

Mikanda hiyo minne ndio rasmi kwenye uzito huo na imefikisha muongo na miaka hakuna bondia aliyeishikilia yote kwa pamoja.

Hii ndio sababu Fury amekuja na kauli mpya ya wazi kuwa hana mpango kabisa wa kupigana na Joshua mwaka huu kama wengi walivyotarajia, bali amewataja mabondia wawili tu ambao amepanga kupigana nao - Usyk ili abebe mikanda yote na Francis Ngannou - mkali wa ngumi mchanganyiko uzito wa juu.