Msanii wa Bongo fleva aliyewahi kutamba na wimbo unaokwenda kwa jina la Robo Saa, Amini Mwinyimkuu ‘Amini’ amesema pamoja na kuachana miaka kadhaa na Linah bado wanashirikiana kufanya naye kazi.
Katika mahojiano yake na Mwananchi, Amini alisema ushirikiano huo uko zaidi kwenye kazi, kwani kuna kazi nyingine Linah anaposhindwa kwenda humpasia. Alisema sikukuu ya Wapendano ya mwaka huu, walialikwa mkoani Iringa, jambo ambalo lilizua gumzo kuwa wamerudiana kutokana na picha zilizokuwa zikisambaa kwenye mitandao.
“Kwa kweli tunashukuru tulipokewa vizuri pamoja na kwamba shoo yenyewe tulifanya katikati ya jumba ambalo lilikuwa likitupa hofu, hii inaoyesha ni namna gani mashabiki wetu bado wanatukabali, tunaahidi kuendelea kushirikiana,” alisema Amini.
Amini ambaye pia ni mtunzi wa nyimbo, alisema wanaamini kuachana siyo uadui na isitoshe kila mmoja aliamua kuwa na maisha yake, hivyo hawaoni haja ya kuchukiana.
Pia alisema wimbo wake wa ‘Nisahaulishe’ aliouchia Februari, Linah alikuwa na mchango mkubwa katika kutoka kwake kwani alimshirikisha kupata ushauri wake wa hapa na pale na kumueleza ni vyema akuachia.