Wanajeshi wa Ethiopia na waasi wa Tigray wako tayari kuruhusu misaada

Wanajeshi wa Ethiopia na waasi wa Tigrayan wamekubali kuruhusu usambazaji wa misaada ya haraka na bila vikwazo katika eneo la Tigray, ambako mamilioni ya watu wanahitaji sana chakula na dawa.

Makamanda wakuu kutoka pande zote mbili walitia saini makubaliano mjini Nairobi, Kenya, kutekeleza usitishaji wa mapigano yaliyokubaliwa tarehe 2 Novemba.

Chombo cha pamoja kitasimamia upokonyaji silaha kwa kundi la Tigray People's Liberation Front (TPLF) kaskazini mwa Ethiopia.

Vita vimekuwa vikiendelea kwa miaka miwili. Nusu ya watu milioni 5.5 wa Tigray wanahitaji msaada wa chakula, na wengi wao wana njaa.

Kamanda mkuu wa TPLF, Jenerali Tadesse Werede Tesfay alisema: "Tumeteseka sana katika miaka miwili iliyopita na bado tunaendelea kuteseka. "Kwa hivyo ahadi tunayofanya leo ni kwa matumaini kwamba mateso ya watu wetu yatakwisha hivi karibuni."

Baada ya kupokonywa silaha, TPLF itaunganishwa katika jeshi la taifa.

Waandishi wa habari wanasema bado kuna wasiwasi kuhusu vikosi vya Eritrea ambavyo vimekuwa vikilisaidia jeshi la serikali ya Ethiopia.

Hawakuwa sehemu ya usitishaji mapigano uliokubaliwa nchini Afrika Kusini mapema mwezi huu. Kumekuwa na ripoti nyingi za ukatili wa pande zote mbili, ikiwa ni pamoja na utakaso wa kikabila na unyanyasaji wa kijinsia.

Rais wa zamani wa Kenya Uhuru Kenyatta, mmoja wa wasuluhishi alisema kutakuwa na "vikwazo vikali" kwa wahusika wa ukatili huo, lakini kipaumbele ni kunyamazisha bunduki, kupata misaada kwa watu na kurejesha huduma.

"Pande zimekubali kuwezesha upatikanaji wa huduma za kibinadamu bila vikwazo kwa wote wanaohitaji msaada katika Tigray na mikoa jirani," ilisema taarifa ya pamoja iliyotolewa Nairobi.

Mashirika ya misaada yanasema yana misafara inayosubiri ruhusa ya kusafiri katika eneo la vita.

Siku ya Jumatano, Mkuu wa Shirika la Afya Ulimwenguni, Tedros Adhanom Ghebreyesus, alisema watu wengi huko wanakufa kutokana na magonjwa yanayotibika na njaa.