Waliomtusi gavana Tiktok wachapwa viboko na kulipa faini ‘ili iwe funzo’

Hakimu mkazi katika jimbo la Kano nchini Nigeria ameagiza watu wawili waliokuwa wakifanya wakicheza densi ya mzaha uliodaiwa kuwa ''matusi'' kwenye Tiktok kuchapwa viboko 20, na kulipa faini ya naira 10,000 na kisha kusafisha maeneo yote ya mahakama kwa siku 30 kwa madai ya kumtukana gavana wa jimbo hilo Abdullahi Ganduje.

Jaji Aminu Gabari aliyeongoza kesi hiyo aliwahukumu Mubarak Muhammad na Nazifi Muhammad, ambao walikamatwa wiki iliyopita kwa kutuma video kwenye Tiktok ambayo inadaiwa kumshutumu Gavana Ganduje kwa ufisadi.

Katika kesi hiyo wakili wa gavana alisema adhabu hiyo itakuwa funzo kwa wengine.

Mara baada ya hukumu kutolewa, afisa wa mahakama aliwatandika viboko 20 washukiwa na kuwataka walipe faini ya naira 10,000 kama ilivyoagizwa na mahakama.