Wahamiaji wahusishwa kuongoza genge la ubakaji

Wakaazi wa kitongoji cha Afrika Kusini karibu na Johannesburg wamechoma moto nyumba za wahamiaji wanaoamini kuwa wanafanya kazi kinyume cha sheria katika migodi ya ndani ambayo haijatumika.

Kumekuwa na hasira nyingi baada ya kundi kubwa la wachimba migodi kutuhumiwa kwa ubakaji wa wanawake wanane wiki iliyopita.

Makumi ya watu wanashikiliwa na polisi kuhusiana na shambulio hilo lakini hakuna aliyefunguliwa mashtaka ya ubakaji.

Katika miaka ya hivi karibuni, umaskini umekuwa mojawapo ya vichochezi vya mashambulizi ya chuki dhidi ya wageni.

Wengine wanaamini - iwe sawa au vibaya - kwamba wageni ndio sababu ya shida zao nyingi.

Watu wa Kagiso wanasema wachimba migodi wa kigeni - wanaojulikana kama Zama Zamas - wanahusika na uhalifu katika eneo hilo. Unyanyasaji wa kijinsia wiki iliyopita katika eneo la karibu la Krugersdorp ulizua hali ya wasiwasi na wakaazi wakaitisha maandamano.

Akielezea msukumo wa maandamano hayo, mkazi mmoja aliambia BBC: "Ninaogopa kwenda kwenye maduka. Polisi wetu hawafanyi lolote."

"Waache kufanya kile wanachofanya," mwanamke mwingine alisema, akiwalaumu wahamiaji kwa mashambulizi ya kikatili.

Siku ya Alhamisi asubuhi, polisi, wakiwa chini na kwenye helikopta, walifyatua maguruneti na risasi za mpira ili kuwatawanya umati wenye hasira waliokuwa wakiwafukuza wachimba migodi.

Watu waliojihami kwa zana za bustani waliwalazimisha kutafuta usalama katika mashimo ya kupitisha hewa ya migodi ya chini ya ardhi.