Viongozi wa Afrika kujadili mzozo wa Niger

Umoja huo haujajibu moja kwa moja lakini ulisema Jumatatu utafanya mkutano wa Alhamisi kujadili mkwamo huo.

Viongozi wa Afrika Magharibi Jumatatu walipanga mkutano utakaofanyika Alhamisi kujadili hatua ya serikali ya Niger kukataa amri ya kumrejesha madarakani rais aliyeondolewa mamlakani na hivyo kuibua matumaini ya kimataifa ya kutafuta suluhu bila ya kutumia nguvu.

Jumuiya ya Kiuchumi ya Nchi za Afrika Magharibi (ECOWAS) ilikuwa imewaambia viongozi wa mapinduzi ya Julai 26 kujiuzulu ifikapo Jumapili la sivyo wakabiliwe na uwezekano wa uingiliaji wa kijeshi lakini utawala wa kijeshi badala yake ulifunga anga ya Niger na kuahidi kuilinda nchi hiyo.

Umoja huo haujajibu moja kwa moja lakini ulisema Jumatatu utafanya mkutano wa Alhamisi kujadili mkwamo huo uamuzi ambao Umoja wa Ulaya na Marekani zilisema unaruhusu nafasi ya upatanishi.

Akiba ya uranium na mafuta ya Niger na jukumu lake kuu katika vita na wanamgambo wa Kiislamu katika eneo la Sahel vinaipa umuhimu wa kiuchumi na kimkakati kwa Marekani, Ulaya, China na Russia.