Ulisaidia Nani": Raila apuuza madai ya DP Ruto kuwa alimsaidia awe waziri mkuu

Kinara wa ODM Raila Odinga amepuuza Naibu Rais William Ruto na mchango wake kwenye uchaguzi wa 2007.

Akiongea na redio Citizen, Raila alisema DP amekuwa akiwapotosha Wakenya kwa kudai kuwa alimsaidia kuwa Waziri Mkuu.

Alisema Ruto hakuwa na mchango wowote spesheli kwenye uchaguzi wa 2007 ambao ulisababisha yeye kupewa wadhifa wa Waziri Mkuu.

“Wakati tulienda Kasarani, tulikuwa tunaenda kuwinda na tukapata windo, nilikuwa wa kwanza na Mudavadi wa pili, na yeye (Ruto) akawa wa tatu," Raila alisema.

Ni baada ya hapo ambapo viongozi hao walimuunga Raila mkono kuwania urais huku Mudavadi akiwa mgombea mwenza.

Baada ya machafuko ya uchaguzi wa huo, serikali ya mseto iliundwa na ndipo Raila akawa Waziri Mkuu huku Mudavadi akiwa naibu waziri mkuu.

"Tulikuwa timu, hakunipa pesa zozote, hakunisaidia, hawezi kusema alifanya lolote la kipekee kuwaliko wengine kama vile Farah Maalim, Joe Nyaga ama Joho," alisema Raila.

DP amekuwa akimtupia vijembe Raila akisema wakati huu wanamlima kisiasa ilhali amekuwa akiwasaidia kisiasa.

"Huyu jamaa wa kitendawili mimi nilisaidia yeye mpaka akawa Waziri Mkuu. Sasa raundi hii mimi nimesema nasaidia mama mboga na hustlers wapate kitu kwa mfuko wanaanza kuwa na fujo na mimi," alisema Ruto.

Yaaani wakati mimi nilikuwa nawasaidia wao nilikuwa mzuri, lakini nikisema nisaidie mama mboga na mtu ya mkokoteni wanasema mimi ni mbaya, nyinyi mnaamini hiyo ukora?" aliongeza.

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia [email protected] au WhatsaApp: 0732482690.

Tazama Video Kemkem za Kusisimua Kutoka hapa TUKO.co.ke