Uhuru anakutana na NASA Mombasa, kuna njama za kumfuta "Ruto"?

Magazeti ya Jumatano Agosti 18 yameangazia taarifa za siasa zinazoendelea kupangwa na vigogo humu nchini kuhusu kuingia Ikulu 2022.

Imejiri kuwa Rais Uhuru Kenyatta anahusika katika kukarabati siasa za 2022 ili kupanga ni nani atamrithi akiondoka.

1. People Daily

Gazeti la People Daily limeripoti kuwa Rais Uhuru amewaita vigogo wa upinzani Mombasa ambapo wanatarajiwa kupanga siasa za 2022.

Kulingana na wandani, Rais anataka viongozi hao kukubaliana kuunda muungano ili kuhakikisha kuwa wanapambana na naibu wake William Ruto.

Mkutano wa Mombasa unajiri siku moja baada ya vigogo hao kufanya mikutano tofauti Naivasha na Nakuru.

Kalonzo Musyoka, Moses Wetangula, Gideon Moi na Musalia Mudavadi walifanya kikao chao Naivasha na kutangaza kuwa muungano wao utakuwa na mgombea wa urais 2022.

Mjini Nakuru, Raila Odinga naye alikuwa na kikao ambapo alitangaza kuwa anaanzisha Tsunami itakayomsaidia kuingia Ikulu.

2. Star

Jarida hili limeangazia maisha ya aliyekuwa gavana wa Nairobi Mike Sonko na masaibu yake katika City Hall.

Mwandishi anasema Sonko ni mfanyabiashara katika sekta ya matatu na alipata utajiri wa mamilioni ya pesa ambao ulimsaidia kuingia City Hall kama mdosi.

Hata hivyo, kundi la matajiri tajika lilihisi Sonko hakufaa kuwa kwenye uongozi wa kaunti hiyo na ndipo vita vikaanza.

Alifanya kosa moja la kutomskiza Rais Uhuru na hapo akawa amegusa kaa la moto ambalo lilimchoma.