Uchaguzi 2022: Seneta Sakaja atangaza kuwania Ugavana Nairobi

Wakati siasa za uchaguzi mkuu wa 2022 zikishika kasi, wanasiasa wanaendelea kujitokeza na kutangaza nyadhifa mbali mbali ambazo wanaazimia kuwania.

Seneta wa Nairobi Johnson Sakaja ametangaza rasmi kwamba atakuwa debeni kuwania kiti cha ugavana wa kaunti ya Nairobi. Kuna tetesi kwamba huenda Sakaja ambaye ni mwanachama wa Jubilee, akatumia tiketi ya chama cha Musalia Mudavadi cha ANC.

Sakaja amesema utendakazi wake umedhihiririshwa wazi na ana matumaini ya kukinyakua kiti hicho.

Seneta wa Nairobi Johnson Sakaja ni wa hivi punde kutangaza rasmi kwamba atakuwa debeni kuwania kiti cha ugavana.

Sakaja amesema utendakazi wake kwa muhula wake wa kwanza umedhihiririshwa wazi na ameonyesha matumaini ya kukinyakua kiti hicho.

"Nimekuwa nikiwasikiza watu wengi hata wale ambao hawakutaka niwanie ugavana lakini kwa sasa wamegundua kwamba kaunti inahitaji mtu kama mimi ambaye anaelewa vema kiwango cha uongozi kinachohitajika," Sakaja alisema.

"Kwa sasa mimi ndio seneta wa Nairobi, lakini ningependa kuwaongoza wakazi wa Nairobi kama gavana wao nikiwa na maono makubwa ambayo nitayatimiza kwa kipindi cha miaka 10 ijayo," Aliongezea.

Mwaka wa 2017, Sakaja alikuwa na azmio la kuwania ugavana wa Nairobi lakini alimuachia nafasi hiyo Mike Sonko ambaye alitimuliwa mwaka wa 2019 kwa madai ya matumizi mabaya ya ofisi.

Ingawa seneta huyo wa Jubilee hakutaja chama ambacho atakitumia kuwania ugavana, kuna tetesi kwamba huenda akatumia tiketi ya chama cha Musalia Mudavadi cha ANC.

Kiti cha ugavana wa NairobI kimewavutia wanasiasa kadhaa akiwemo mbunge wa Westlands Tim Wanyonyi, kaimu gavana wa sasa Ann Kananu, mbunge wa zamani wa Dagoreti Kusini Dennis Waweru, askofu Margaret Wanjiru na mfanyabiashara Agnes Gakure.