UTATA: Ubalozi wa China wajibu taarifa Uwanja wa Entebbe kushikiliwa
Ubalozi wa China nchini Uganda jana ulijibu ripoti kwamba taifa hilo la Afrika Mashariki lilikuwa katika hatari ya kusalimisha Uwanja wa Ndege wa Kimataifa wa Entebbe kwa China kwa mkopo wa dola milioni 200 (takriban Ush713 bilioni).
Kiasi hicho cha mkopo kilipatikana kupitia makubaliano yaliyotiwa saini Machi 31, 2015 kati ya serikali ya Uganda na Benki ya Exim-Import ya China.
Hata hivyo, inasemekana, mkataba huo ulikuwa na vipengele vigumu na hatari vinavyoeleza kuwa kama havitarekebishwa basi mali huru za Uganda zitachukuliwa na mkopeshaji kwa mujibu wa maamuzi ya mahakama ya Beijing.
Zaidi ya hayo, ripoti kutoka Uganda zinasema kwamba uchunguzi umebaini kuwa kesi dhidi ya mali za Mamlaka ya Usafiri wa Anga ya Uganda (UCAA) na mkopeshaji hazitalindwa na kinga ya uhuru kwa vile serikali, katika makubaliano ya 2015 iliondoa kinga dhidi ya mali ya uwanja wa ndege.
Vyanzo vya habari nchini Uganda vinasema hatari iliyowasilishwa na Mkataba wa Ufadhili wa Machi 7, 2019 iliifanya serikali kutuma ujumbe wa watu 11 kwenda Beijing kuiomba Benki ya Exim kujadili upya vifungu vinavyopingwa na Kampala. Lakini, hilo lilikataliwa, na kuzidisha hatari.
Lakini, jana, Msemaji wa Ubalozi wa China nchini Uganda, Bw Fang Yi, alijibu ripoti za vyombo vya habari, akisema kwamba ushirikiano kati ya China na Uganda siku zote umekuwa ukizingatia kanuni za ukweli, uwazi, usawa na manufaa ya pande zote mbili.
"Mikataba yote ya mikopo - ikiwa ni pamoja na mradi wa upanuzi na uboreshaji wa Uwanja wa Ndege wa Entebbe - ilitiwa saini kwa hiari na pande zote mbili baada ya mazungumzo kwa usawa, na bila masharti yoyote ya siri au masharti ya kisiasa kuambatanishwa," inasomeka taarifa hiyo kwa sehemu.
"Masharti ya makubaliano ya mkopo wa mradi wa upanuzi na uboreshaji wa Uwanja wa Ndege wa Entebbe yanafuata kikamilifu mikataba na mazoea yaliyopo katika masoko ya fedha ya kimataifa."
Bw Fang anasema katika ripoti hiyo kwamba madai ya nia mbaya kwamba "Uganda inasalimisha mali muhimu kwa pesa za China" hayana msingi wa kweli, na yana nia mbaya ya kuvuruga uhusiano mzuri ambao China inafurahia na nchi zinazoendelea, ikiwa ni pamoja na Uganda.
"Hakuna mradi hata mmoja barani Afrika ambao umewahi kutwaliwa na China kwa sababu ya kushindwa kulipa mikopo ya China. Kinyume chake, China inaunga mkono kwa dhati - na iko tayari kuendelea na juhudi zetu - kuboresha uwezo wa Afrika wa maendeleo yanayoendeshwa nyumbani," inasomeka sehemu nyingine ya taarifa hiyo.