Simba mzee auawa kwa kuchomwa mkuki

Mmoja wa Simba wazee zaidi Kenya amefariki dunia akiwa na umri wa miaka 19 nchini Kenya, mamlaka imesema.

Simba huyo dume kwa jina Loonkiito, alichomwa mkuki na wafugaji wa eneo hilo katika kijiji cha Olkelunyiet Jumatano usiku wakiwa wanawinda mifugo.

Kijiji hicho kinapakana na Mbuga ya Kitaifa ya Amboseli nje kidogo ya mji mkuu, Nairobi.

Msemaji wa Shirika la Huduma ya Wanyamapori nchini (KWS) Paul Jinaro aliambia BBC kwamba simba huyo alikuwa mzee na dhaifu na alirandaranda katika kijiji hicho kutoka mbugani kutafuta chakula.

Bw Jinaro hakuweza kuthibitisha ikiwa ni simba mzee zaidi nchini lakini amebainisha kuwa ni "mzee sana".

Lion Guardians, shirika la uhifadhi, lilisema Loonkiito ndiye simba dume mzee zaidi katika mfumo wake wa ikolojia na pengine barani Afrika.

"Alikuwa ishara ya uthabiti na maisha marefu," shirika hilo lilisema katika taarifa.

Paula Kahumbu ni mhifadhi wa wanyamapori na ofisa mtendaji mkuu wa shirika la WildlifeDirect, Paula Kahumbu alisema amehuzunishwa na mauaji ya simba huyo na kutaka hatua zichukuliwe ili kulinda wanyamapori nchini.

"Hiki ndicho kitovu cha mzozo kati ya binadamu na wanyamapori na tunahitaji kufanya zaidi kama nchi kuwalinda simba, ambao wanakabiliwa na kutoweka," Bi Kahumbu aliambia BBC.