Shakahola itabadilishwa kuwa eneo la kumbukumbu ya kitaifa - Waziri

Waziri wa Usalama wa Ndani Kithure Kindiki amesema msitu wa Shakahola utabadilishwa kuwa eneo la kumbukumbu la kitaifa.

Akizungumza katika Kaunti ya Kilifi siku ya Jumanne, Kindiki alisema eneo hilo haliwezi kubaki jinsi lilivyo.

Alisema baada ya zoezi la ufukuaji kukamilika, Serikali itaita mkusanyiko wa waumini wote nchini na uongozi wa kitaifa kwa ajili ya ibada ya kumbukumbu.

"Serikali itaugeuza kuwa eneo la ukumbusho wa kitaifa, ili Wakenya na ulimwengu wasisahau yaliyotokea hapa," alisema.

Waziri huyo alisisitiza kiapo chake cha kuhakikisha kuwa kasisi mwenye utata Paul Mackenzie, ambaye ndiye mshukiwa mkuu wa vifo vya Shakahola, anatiwa hatiani.

Anashutumiwa kwa kuwaambia wafuasi wake kufunga hadi kufa ili kukutana na muumba wao. Waziri huyo pia alifichua kwamba wale waliobadili mawazo yao kuhusu kufunga waliuawa.