Ruto kukutana na wabunge wa Kenya Kwanza leo

Rais William Ruto ataongoza mkutano wa Kikundi cha Wabunge wa Kenya Kwanza Alhamisi asubuhi.

Huu utakuwa ni mkutano wa kwanza wa aina yake kwa muungano baada ya Bunge kuidhinishwa rasmi.

Wabunge kutoka muungano huo watahudhuria wakiongozwa na viongozi wa bunge. Kulingana na Katibu wa Habari wa Ikulu Emmanuel Talam, watajadili ajenda ya Bunge la Kenya Kwanza.

Mkutano huo unakuja siku ambayo Bunge limepangwa kuwachagua wenyeviti na makamu wenyeviti wa kamati mbalimbali.

Muungano wa Kenya Kwanza ukiwa ndio wa wengi katika bunge utaongoza kamati zote isipokuwa Kamati ya Hesabu za Umma (PAC) na Kamati ya Uwekezaji wa Umma (PIC).

Wiki iliyopita, Seneti ilichagua wenyeviti na makamu wenyeviti wa kamati zao huku Kenya Kwanza ikibeba viti vyote isipokuwa viwili.