Rais Uhuru apandwa na hasira na kuwafukuza maafisa wa Jubilee Ikulu

- Chama tawala cha Jubilee kilipoteza katika chaguzi ndogo za maeneo bunge ya Juja, Bonchari na Wadi ya Rurii

- Matokeo hayo yamemfanya Uhuru kama kiongozi wa chama kupandwa na hasira

- Anaripotiwa kumpigia simu naibu mwenyekiti wa Jubilee David Murathe na kumsuta, akitaka kujua namna alipoteza kwenye ngome yake licha ya kuhakikishia Jubilee ushindi

Rais Uhuru Kenyatta ameonyesha hasira yake baada ya chama tawala cha Jubilee ambapo yeye ndiye kiongozi kilipoteza chaguzi ndogo za Wadi ya Rurii na maeneo bunge ya Juja na Bonchari.

Kiongozi wa taifa anaripotiwa kumpigia simu naibu mwenyekiti wa Jubilee David Murathe na kumsuta, akitaka kujua namna alipoteza kwenye ngome yake licha ya kuhakikishia Jubilee ushindi.

"Alifukuza kila mtu Ikulu.Aliambia kila mtu aende nyumbani akihoji kuwa hakuna kitu cha maana ambacho walikuwa wanamwambia.Alisema kutokana na kupoteza kwenye chaguzi hizo ni dhahiri kuwa wameshindwa katika mtihani wao," duru iliambia The Standard.

Rais alimlaumu Murathe, Katibu Mkuu wa Jubilee Raphael Tuju, Winnie Guchu na washauri wengine kwa ushinde huo.

Afisa mwingine mkuu serikalini ambaye aliomba jina lake kubanwa, alifichua kuwa Rais Uhuru hakutaka kuwaona viongozi hao na alikuwa amechoshwa na 'uwongo' wao.

Murathe, hata hivyo, amecheza chini kuhusu suala hilo na kushangaa mbona chama cha Naibu Rais William Ruto, United Democratic Alliance kinapenda kushindana na rais.

"Hii ni siasa. Bonchari, kwa mfano hakikuwa kiti chetu. Kilikuwa cha chama cha Peoples Democratic Party (PDP). Eneo hilo Orange Democratic Movement (ODM) kilishinda kwa hivyo shida iko wapi?"alimaka.

Uchaguzi mdogo wa Rurii katika kaunti ya Nyandarua ulikuwa kivumbi kikali kati ya mgombea wa Jubilee Peter Thinji na mgombea wa Ruto, Francis Muraya.

Muraya alitangazwa mshindi baada ya kupata kura 4,303 dhidi ya Thinji aliyepata kura 3,143.

Katika uchaguzi mdogo wa Juja, George Koimburi wa chama cha People's Empowerment Party alitangazwa mshindi.

Koimburi alikusanya kura 12, 159 akifuatwa kwa umbali na mgombea wa tiketi ya chama cha Jubilee Susan Waititu ambaye alipata kura 5, 746.

READ ENGLISH VERSION

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia [email protected] au WhatsaApp: 0732482690.