Rais Uhuru Kenyatta aomboleza kifo cha Bilionea Chris Kirubi

Rais Uhuru Kenyatta ameungana na Wakenya wenzake kuomboleza kifo cha mfanyabiashara mkubwa Chris Kirubi.

Kirubi alifariki dunia Jumatatu, Juni 14 mwendo wa saa saba mchana akiwa nyumbani kwake.

Kulingana na Uhuru Kirubi alikuwa mchangamfu, kiongozi mwenye mawaidha na aliyependa kukuza uwekezaji na maendeleo ya kiuchumi nchini.

Kirubi alifariki dunia baada ya kuugua kwa muda mrefu kutokana na ugonjwa wa saratani.

" Nimepokea habari za kifo cha rafiki wangu Chris Kirubi kwa mshtuko, nina huzuni mwingi sana. Mkono wa mauti umetupokonya mzalendo ambaye pia alikuwa mjasiriamali mwenye ujuzi wa kipekee, Kirubi atakumbukwa kwa kuwasaidia maelfu ya vijana kupata ajira nchini," Alisema Uhuru.

Uhuru aliongezea kwamba Kirubi alikuwa mwanasiasa ambaye angefikiwa kwa urahisi na alitangamana na kila aina ya mwananchi.

Kirubi alikuwa mwanafunzi wa shule ya upili ya Kamusinga iliyoko kanti ya Bungoma, marehemu anamiliki kampuni kadhaa Caapital Group , Haco Industries na Centum Investments.

Kifo cha Kirubi kilithibitishwa na familia yake Jumatatu, Juni 14.

" Ni kwa huzuni mkubwa kutangaza kifo cha Dkt Christopher J. Kirubi kilichotokea Jumatatu Juni 14 mwendo wa saa saba mchana akiwa nyumbani kwake. Marehemu amekuwa akiugua kwa muda mrefu kutokana na ugonjwa wa saratani. Alikata roho akiwa amezingirwa na familia yake,"Taarifa kutoka kwa familia ilisoma.

Saa chache kabla ya kifo chake, Kirubi kama ilivyokawaida yake aliwatakia mashabiki wake kupitia mtandao wa Twitter wiki njema yenye fadhila na furaha tele.

" Siku inapoanza, rafiki wangu, haipaswi kuwa Jumatatu ya kuchosha badala yake nakutakia heri njema, fadhila, mafanikio na furaha tele wiki hii mpya. Jipe ratibu ya mafanikio. Furahia siku yako na wiki nzima kwa jumla," Ujumbe wa mwisho wa Kirubi.

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia [email protected] au WhatsaApp: 0732482690.

Tazama habari kemkem za TUKO hapa