Rais Tinubu awarejesha nyumbani mabalozi wote wa Nigeria

Rais wa Nigeria, Bola Ahmed Tinubu amewaagiza mabalozi wote wa nchi hiyo ya Afrika Magharibi katika kona zote za dunia kurejea nyumbani.

Shirika la habari la TASS limeripoti habari hiyo na kueleza kuwa, Rais Tinubu amewataka mabalozi wote wa nchi hiyo kurejea nyumbani mara moja.

Ajuri Ngelale, Mshauri Maalumu ambaye pia ni Msemaji wa Tinubu amesema waliosazwa kwenye tangazo hilo la Tinubu ni mabalozi wa kudumu wa Nigeria katika ofisi za Umoja wa Mataifa mjini New York na Geneva.

Habari zaidi zinaarifu kuwa, wanadiplomasia hao wa Nigeria katika ofisi za Umoja wa Mataifa wameachwa kwa ajili ya maandalizi ya mkutano ujao wa Baraza Kuu la Umoja wa Mataifa (UNGA) utakaofanyika baadaye mwezi huu.

Tinubu ambaye ni Rais wa tano wa Nigeria tokea kurejea kwa utawala wa demokrasia nchini humo mwaka 1999; na ambaye miezi michache iliyopita alichukua hatamu za uongozi baada ya kushinda katika uchaguzi, anakabiliwa na changamoto nyingi za kiuchumi na kiusalama.

Ameshafanya mabadiliko mengi ya kushtukiza na kushangaza tangu aingie madarakani, kama kulipangua jeshi wiki chache baada ya kuapishwa, na kuondoa ruzuku ya mafuta.

Wananchi wa Nigeria walifanya maandamano hivi karibuni katika miji mbalimbali ya nchi hiyo wakipinga kuondolewa ruzuku hiyo.