Raila awataka wafuasi wake kumkaribisha Rais Uhuru Kisumu kwa shangwe

- Raila alisema ziara ya Rais itakuwa na manufaa kwa wakazi na hivyo kutaka apewe makaribisho mazuri

- Rais na kikosi chake wataingia kaunti hiyo wiki ijayo kuongoza sherehe za Madaraka Dei

- Siasa za BBI zinatarajiwa kusheheni kwenye sherehe hizo kwa kuwa ngome ya Raila inaunga mkono pakubwa mageuzi ya BBI

Kinara wa ODM Raila Odinga amewataka wafuasi wake kumkaribisha Rais Uhuru Kenyatta Kisumu kwa shangwe wiki ijayo.

Rais Kenyatta anatarajiwa Kisumu Jumanne Juni 1 kuongoza sherehe za Madaraka Dei katika uwanja wa Jomo Kenyatta.

Raila Jumatatu Mei 24 alianza ziara ya eneo la Nyanza ambapo ni ngome yake kisiasa na kuwataka wafuasi wake wampe Rais makaribisho ya kukata na shoka.\

"Nimekuja hapa na ujumbe. Na ujumbe huo ni kuwa wiki ijayo tutakuwa na wageni watajika na ninataka mkaribishe Rais na kikosi chake kwa mbwembwe," alisema Raila wakati wa ziara yake.

Alifanya ziara hiyo maeneo kadhaa ikiwamo Kondele ambapo ana ufuasi mkubwa na ambapo inatarajiwa Rais huenda akasimama kuwahutubia wakazi.

Sherehe hizo za Madaraka Dei zimeambatana na wakati ambapo Rais na Raila wanaendeleza kampeni za marekebisho ya kikatiba.

Wakati wa ziara hiyo, Raila aliwaambia wakazi wasiwe na wasiwasi kuhusu kutupiliwa kwa mswada huo na Mahakama ya Juu akisema ni changamoto ndogo.

Aliwahakikishia kuwa watapata ushindi katika Mahakama ya Rufaa huku akishikilia msimamo wake kuwa 'nobody can stop reggae'.

Duru zimearifu TUKO.co.ke kuwa viongozi wa chama cha ODM kutoka eneo hilo wamekuwa wakifanya vikao kuhusu makaribisho ambayo Rais atapokea.

Wametakiwa kuweka tofauti zao kando ili kuhakikisha kuwa serikali imepata ukaribisho unaofaa.

Raila aliwaambia wakazi kuwa ziara ya Rais eneo hilo itakuwa na matunda akitumia methali ya 'mgeni njoo mwenyeji apone'.

Inaarifiwa Rais atazuru miradi kadhaa ya maendeleo eneo hilo ikiwamo mradi wa reli ambao unatarajiwa kufika Kisumu kutoka Naivasha.

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia [email protected] au WhatsaApp: 0732482690.