Mwanahabari Mwingine Aaga Dunia Kutokana na COVID-19

Shirika la Africa Group linaomboleza kifo cha mwanahabari wa gazeti la The Star Reuben Githinji ambaye inasemekana alifariki dunia kutokana na virusi vya Covid-19.

Dadake Githinji, Grace Wacheke, alithibitisha habari akibainisha kwamba mwandishi huyo aliangamia Jumatano, Machi 24, akipokea matibabu katika Hospitali ya Murang'a.

Hadi kifo chake, Githinji alikuwa akihudumu kama mwandishi wa The Star Newspaper huko Embu na alikuwa na umri wa miaka 52.

"Kakangu ameaga dunia kutokana na COVID-19. Tumepokea habari za kifo chake kwa mshtuko mkubwa sana," alisema.

Alifichua kuwa kakake amekuwa akiuguzwa katika Hospitali ya Rufaa ya Embu kwa wiki moja tangu Jumatatu, Machi 15, baada ya kulalamika kuhusiana na matatioz ya kupumua.

Alipofika hospitalini, aliwekewa oksijeni kabla ya kuhamishwa hadi chumba cha wagonjwa mahututi hali yake ilipoanza kuwa mbaya.

Kwa bahati mbaya, ilibidi familia yake imsafirishe hadi Hospitali ya Murang'a kwani chumba hicho tayari kilikuwa kimejaa wagonjwa. Aliaga dunia siku chache baadaye.

Githinji ameawaacha nyumba mke na mtoto mmoja ambaye anajiandaa kuufanya mtihani wa Kitaifa wa Kidato cha Nne (KCSE).

Githinji atazikwa nyumbani kwake kijijini huko Nyahururu.

"Tutakutana kama familia kufanya mipango ya mazishi ya kaka yetu mpendwa," Wacheke alisema.

Kifo hicho kinajiri siku chache baada ya mwandishi wa habari Lona Irungu kufariki dunia Jumatatu, Machi 22, baada kukabiliana na virusi vya Covid-19.

Irungu alikuwa mkurungezi mkuu wa kundi la Gina Din katika runinga ya NTV kwa muda mrefu.

Marehemu alikuwa amefanya kazi katika stesheni ya redio ya Nation FM, runinga ya KTN na pia aliwahi kuwa mwendeshaji wa kipindi cha Omo Pick A Box kilichokuwa kikipeperushwa katika runinga ya KBC miaka ya 1990s.

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia [email protected] au WhatsaApp: 0732482690.