Muuaji wa Edwin Chiloba aomba kuachiwa huru

Mshukiwa mkuu katika mauaji ya mwanamitindo Edwin Chiloba aitwaye Jackton Odhiambo ameomba kuachiliwa kwa dhamana kesi yake ikitarajiwa kuanza kusikizwa.

Akitokea mahakamani mara ya kwanza pamoja na washukiwa wenzake, Odhiambo alisema kuwa alitaka kuachiliwa kwa dhamana ili aendelee kufanya kazi na kukimu familia yake.

"Ninaomba kuachiliwa kwa dhamana ili niendelee kufanya kazi na kukimu familia yangu," Odhiambo alililia mahakama ya Eldoret.

Odhiambo alipaza kilio chake lwa Hakimu Mkuu Mkaazi Richard Odenyo licha ya ripoti ya polisi kusema kuwa alikiri kumuua Chiloba kwa misingi ya kukosa uaminifu katika mapenzi yao.

Hakimu Odenyo hata hivyo amekataa ombi hilo ni kuamuru kuzuiliwa kwa washukiwa watano wa mauaji hayo kwa siku 21 zaidi ili kuruhusu polisi kukamilisha uchunguzi walivyotaka polisi.

"Tunahitaji siku 21 kukamilisha uchunguzi kwa kuwa zoezi la kuufanyia mwili upasuajii bado halijakamilika," Stephen Mumba, mkuu wa DCI Eldoret anasema katika ombi lake.