Mtoto aliyepotea apatikana akiwa hai, ameng'olewa macho

Kikosi maalum cha polisi kimetumwa katika kijiji kimoja huko Kisii kuchunguza kisa cha kustaajabisha ambapo watu wanaoshukiwa kuwa majambazi walimteka nyara mtoto wa miaka mitatu na kumng'oa macho kabla ya kumtupa kwenye shamba la migomba la familia hiyo.

Genge hilo linasemekana kumchukua mtoto huyo kutoka kwa familia yake huko Marani mnamo Jumatano, Desemba 14 jioni na kumshikilia kwa zaidi ya saa sita, na kusababisha familia hiyo kuingiwa na hofu huku wakitafuta aliko mtoto huyo bila mafanikio.

Mtoto huyo alikimbizwa katika Hospitali ya Macho ya Kisii baada ya kupatikana uso wake ukiwa na damu.

Madaktari wamesema ataendelea kuwa kipofu kwa sasa na anaendelea kupata nafuu katika wadi ya jumla baada ya kufanyiwa upasuaji.

"Macho yake yote mawili yalikuwa yametolewa kabisa na kuna majeraha kwenye vifuniko…kwa hivyo inaonekana kama kulikuwa na kifaa chenye ncha kali kama kisu kilichotumiwa," Dkt Daniel Kiage katika kituo hicho alisema.

Wakaazi wa kijiji cha Ikuruma huko Marani kaunti ya Kisii bado hawajaeleza kiini cha kisa hicho.

Awali polisi walikuwa wamemkamata mmoja wa jamaa wa mvulana huyo kama mshukiwa wa uchunguzi lakini baadaye wakamwachilia kwa kukosekana kwa ushahidi wa kumuhusisha na uhalifu huo.

Timu ya wapelelezi imetumwa kutoka Nairobi ili kuongeza wenzao katika uchunguzi.

Mkurugenzi wa Upelelezi wa Makosa ya Jinai Mohamed Amin alisema wanataka kujua sababu na waliosababisha tukio hilo la ajabu.

Nguo za bandeji zinafunika utupu ambapo macho yake yalikuwa.

Familia yake inatoa wito kwa polisi kuharakisha uchunguzi na kuwafikisha kwa wahusika kuhukumiwa.

Madaktari walisema mvulana huyo ameratibiwa kufanyiwa upasuaji wa pili mara tu atakapokuwa na utulivu wa kutosha.

Bibi wa mvulana huyo Rael Mayieka aliambia polisi kwamba yote yalianza wakati mjukuu wake, alipoenda kuchota maji kwenye chemchemi iliyo karibu.

Alikuwa pamoja na watoto wengine lakini inasemekana alitupa jeri yake kwenye kichaka kilicho karibu na kuanza kukimbia.

Watoto wengine walipofika nyumbani wakiwa na mitungi yao iliyojaa maji, walimjulisha nyanya yake kilichotokea. Bibi alikwenda kwenye chemchemi akimtafuta mjukuu wake, lakini hakuonekana.

Ilikuwa hadi siku iliyofuata ambapo kaka yake mkubwa ambaye alikuwa amekwenda kukata nyasi kwa ajili ya ng'ombe alimkanyaga kwenye shamba la mahindi na kuwatahadharisha.