Mapinduzi Gabon: Mtoto mkubwa wa Rais Ali Bongo ameshikiliwa na jeshi

Tumepata maelezo zaidi kuhusu kukamatwa kwa mtoto mmoja wa Rais Ali Bongo, jambo ambalo lilitangazwa na viongozi wa mapinduzi hapo awali.

Kulingana na shirika la habari la Ufaransa AFP, ni mtoto wa kiume mkubwa wa rais Noureddin Bongo Valentin - anayedhaniwa kuwa na umri wa miaka 31 - ambaye amezuiliwa.

Valentin aliteuliwa kuwa "mratibu wa maswala ya rais" mnamo 2019 na alibaki katika wadhifa huo kwa miezi 21, kulingana na Radio France Internationale.

Wengine waliotajwa kukamatwa ni mkuu wa wafanyakazi wa rais Ian Ghislain Ngoulou, washauri wengine wawili wa rais na maafisa wawili wakuu katika chama tawala cha Gabon Democratic Party (PDG) .

Sita hao wanatuhumiwa kwa uhaini, ubadhirifu, ufisadi na kughushi sahihi ya rais, miongoni mwa madai mengine, jeshi lilisema.